Kampavínsveggur: Skemmtileg nýjung fyrir garðinn

Við hjá Urban Beat erum alltaf að leita að nýjungum fyrir garðinn. Skemmtilegasta nýjungin okkar þessa dagana er kampavínsveggurinn. Við höfum verið að þróa þetta mannvirki síðustu árin og nú er enginn garður án kampavínsveggs. En hvað er kampavínsveggur? Til hvers er hann og hvernig lítur hann út?


Kampavínsveggur, pergóla, bekkur, geymsluhús, trépallur og heitur pottur.
Kampavínsveggur og innbyggður bekkur eru hér í skjóli pergólu

Hugmyndin kom upp þegar ég var að vinna að hönnun þakgarðs í Stokkhólmi. Ég og sænskur kollegi minn, hann Johan, vorum að finna leiðir til að brjóta svæðið á þakinu upp. Við mátuðum meðal annars gróðurker, girðingar og skjólveggi. Þegar kom að því að útbúa skilrúm á milli svæðis sem átti að vera sérafnotareitur íbúðar og svæðis sem yrði almenningur fyrir íbúa hússins fannst okkur þurfa eitthvað með sérstökum karakter. Mannhæðarhár skjólveggur myndi bæði minnka svæðið og mynda skugga í kvöldsólinni. Þarna þurfti mannvirki sem yrði mátulega hátt og virkaði sem hluti af innréttingum beggja svæðanna.


Hér geta gestir staðið við vegginn og spjallað við grillmeistarann

Við féllumst á fallega klæddan vegg, mögulega með steinplötu á hliðina sem snéri upp. Svo fór umræðan í hvernig ætti að stilla af hæð og breidd veggjarins. Niðurstaðan var sú að hæðin væri stillt þannig að þægilegt yrði að leggja frá sér glös, kannski sérstaklega kampavínsglös. Þá sagði hann Johan samstarfsmaður minn að auðvitað væri þetta kampavínsveggur.


Kampavínsveggur, hleðsla, bekkur, hellur og gróðurbeð.
Hlaðinn kampavínsveggur sem kallast á við hlaðna bekkinn og kantsteinana við beðin
Kampavínsveggur, útilýsing, hellur og skjólveggir.
LED lýsing undir borðplötunni er falleg og skapar skemmtilega stemningu

Næst stilltum við breiddina þannig að platti með snittum kæmist vel fyrir. Þá var orðið partífært við kampavínsvegginn fína. Þarna yrði hægt að standa við vegginn, halla sér upp að honum, sötra kampavín og gæði sér á góðgætinu sem gestgjafinn myndi bera fram.


Trépallur, kampavínsveggur, hengirúm, trépallur, smáhýsi og útieldhús.
Það er upplagt að fá sér fordrykk við kampavínsvegginn áður en sest er að snæðingi inni í útieldhúsinu
Flísahellur, kampavínsveggur, steyptir veggir og dvalarsvæði.
Kampavínsveggurinn setur punktinn yfir i-ið í þessum glæsilega garði

Takk fyrir að lesa og góða skemmtun í garðveislum sumarsins :-)




Recent Posts

See All