Straumar og stefnur í garðhönnun 2026

Við upphaf vetrar höfum við hjá Urban Beat haft þann sið að líta til baka yfir verkefni ársins og spá síðan fyrir um hver verða helstu áhersluefnin í garðhönnun á komandi ári. Þetta eru skemmtilegar pælingar þar sem við skoðum það helsta sem er á döfinni erlendis og hér heima, litaval, skipulag og spennandi nýjungar.

Heitur, kaldur og notaleg sturta

Hér má njóta útsýnis í góðu skjóli þar sem heitur og kaldur pottur hafa verið staðsettir saman. Trefjar bjóða upp á mikið úrval vandaðra potta ásamt öllum aukahlutum. https://trefjar.is/heitir-pottar/#pottarnir

Undanfarið höfum við séð aukna áherslu í þá átt að nýta garðinn til heilsuræktar og heitir og kaldir pottar spila þar svo sannarlega stórt hlutverk. Á komandi ári mun sá mikli áhugi sem við höfum séð á þessari pottatvennu án efa fara vaxandi. Útisturtan nýtur einnig mikilla vinsælda meðal viðskiptavina okkar enda fátt meira hressandi en góð sturta utandyra. Við spáum því að þessi þrenning muni fá enn meira vægi í görðunum okkar á komandi ári.

Gufubað fyrir heilsuna

Hér er skemmtileg samsetning gufubaðs, útisturtu, potts og geymslubekkjar. Verslunin Sauna sérhæfir sig í gufuböðum og hjá þeim er að finna hágæða lausnir fyrir heilsueflandi garða. https://sauna.is/collections/utisaunur

Og áfram með heilsufarslegan ávinning þess að eiga garð, sýnt hefur verið fram á hollustu þess að fara í gufubað og þá jafnt fyrir líkamlega sem andlega heilsu. Við höfum grun um að vinsældir þess að eiga sitt eigið gufubað muni aðeins fara vaxandi enda margar spennandi lausnir og útfærslur í boði!

Eldað úti í öllum veðrum

Hér er veglegt útieldhús með margvíslegum búnaði.

Útieldhús hafa notið gríðarlegra vinsælda síðustu ár og í görðunum okkar hafa orðið til alls kyns útfærslur, allt frá litlum grillskýlum upp í stærðar eldhús. Við höfum trú á að vinsældir útieldhúsanna muni síst fara minnkandi á komandi ári heldur springa út með tilkomu alls kyns nýjunga og aukahluta. Við hlökkum til að sjá hvert árið 2026 mun leiða okkur í þessari spennandi þróun.

Sumarið lengist svo um munar

Til eru fjölbreytt og vönduð gróðurhús sem henta íslenskum aðstæðum.

Það mannvirki sem virðist vera að slá algjörlega í gegn í görðum landsmanna er gróðurhúsið eða garðhýsið. Sá möguleiki að geta lengt sumarið svo um munar með þessum fallegu glerhýsum heillar marga og þá alls ekki aðeins til að rækta gróður. Borðstofa, slökunarrými, yogastúdíó eða hobbíherbergi, notkunarmöguleikarnir eru ótal margir.

Viðhaldslítill garður

Í þessum garði er úr mörgu að velja, púttvöllur, heitur pottur, gufubað, útisturta, kampavínsveggur og svæði til slökunar. Vinnan við viðhald mun þó ekki verða mikil þar sem gróður er í lágmarki og notast er við flísahellur og gervigras.

Garður sem krefst lítils viðhalds og hægt er að njóta, án þess að hafa samviskubit yfir öllu því sem þarf að sinna, er draumur margra. Að reyta arfa, bera á palla og klippa runna er ekki fyrir alla og uppteknu fólki þykir gott að geta notað garðinn til slökunar og tómstunda. Árið 2026 munu eflaust margir leggja áherslu á að geta nýtt frístundirnar í garðinum á þann hátt og hönnunarvinnan mun taka mið af því.

Fyrir árin eftir vinnu

Í þessum garði hefur verið komið fyrir gervigrasi og púttvelli ásamt þægilegum bekkjum.

Þegar hægist um hjá fólki og frístundum fjölgar vex mörgum í augum sú vinna sem fer í að

sinna viðhaldi garðsins. Fólk vill gjarnan nota tímann til að sinna hugðarefnum og fólk sér ekki fyrir sér umhirðu garðs í framtíðarplaninu auk þess sem mörgum reynist sú líkamlega vinna sem tilheyrir garðstörfum erfið. En þetta eru einmitt þau atriði sem auðvelt er að taka inn í ferlið og hanna viðhaldslitla en jafnframt glæsilega garða sem taka mið af þörfum hvers og eins. Vel hannaður og fallegur garður getur þess vegna verið einn af þeim hlutum sem veita ánægju um ókomin ár.

Litapalletta sem veitir hlýju

Hlýir litatónar í bland með gráu og svörtu.

Gjarnan er sagt að tískan fari í hringi. Svartir og gráir litatónar hafa lengi verið áberandi í garðhönnun og munu halda velli áfram. Þó sjáum við tilhneygingu til bjartari litatóna, brúntóna litir koma sterkari inn ásamt mosagrænum tónum. Við sjáum fyrir okkur litatóna kaffibaunanna, málmtóna koparsins og dempaða mosaliti. Og síðan en ekki síst litapallettu sem tekur mið af hverju heimili fyrir sig og endurspeglar í enn ríkari mæli en áður áherslur og stíl eigendanna.

Glæsileiki og þægindi

Horft inn í útieldhús, pottasvæði og gróðurhús í bakgrunni.

Vel hannaðir og útfærðir garðar eru eðlilegt framhald af húsinu sjálfu og falleg garðhúsgögn og annar aukabúnaður setja punktinn yfir i-ið. Úrval vandaðra húsgagna, útieldhúseininga, grilla og gróðurkerja hefur aukist mikið síðustu ár ásamt fjölbreyttri lýsingu sem lyftir garðinum upp á annað stig. Árið 2026 verður árið þar sem enn ríkari áhersla verður lögð á þessa aukahluti og garðarnir munu í auknum mæli fá á sig lúxusyfirbragð.

Meiri tækni í hönnunarvinnu

Að skoða garðinn sinn í sýndarveruleika er frábær leið til að sjá hvernig hann kemur til með að líta út og hvernig húsið og garðurinn spila saman.

Hjá Urban Beat hefur alltaf verið lögð áhersla á að nýta nýjustu tækni í hönnunarferlinu. Við teiknum alla garðana okkar í þrívídd og leggjum áherslu á vandaða grafík. Viðskiptavinir okkar skoða garðana sína í sýndarveruleika og eiga því mun auðveldara með að sjá fyrir sér hvernig garðurinn þeirra muni koma til með að líta út eftir framkvæmdir. Við nýtum okkur einnig öpp sem sýna sólargang eftir mismunandi árstíðum, þrívíðar skannanir og einnig aðstoðar gervigreindin okkur við myndrænar útfærslur og samanburð mismunandi lausna.

Við hjá Urban Beat bíðum spennt eftir komandi hönnunarári og hlökkum til að fylgjast með nýjungum og spennandi tækifærum í garðhönnun sem gera okkur kleift að njóta lífsins enn betur í garðinum.